៣. ការហ៊ឺហារចំណាយខ្ជះខ្ជាយខុសគោលដៅ

ការមានទ្រព្យសម្បត្តិច្រើនជារឿងល្អ និងគួរឱ្យកោតសរសើរបំផុត ប្រសិនបើទ្រព្យទាំងនោះទទួលបានដោយអំពើសុចរិត។ ប៉ុន្តែវាជារឿងគួរឱ្យបារម្ភបំផុត ប្រសិនបើមានទ្រព្យច្រើនហើយ ប៉ុន្តែមានអំនួតអួតសម្ងែងគេ រហូតធ្វើឱ្យការចំណាយលុយកាក់ទ្រព្យសម្បត្តិមិនចំគោលដៅ យកលុយទិញឡានរាប់សិបគ្រឿង ទិញសម្ភារនិយមផ្សេងៗដែលជាបំណុល នោះចុងក្រោយអាចនឹងផុងខ្លួនក្នុងបំណុលក៏ថាបាន។

៤. ការរកស៊ីលើអ្វីដែលគ្មានជំនាញ ជាមួយមនុស្សមិនស្មោះត្រង់

ប្រសិនបើអ្នកចេញរកស៊ីលើអ្វីដែលគ្មានជំនាញ រកស៊ីចូលហ៊ុនតាមគ្នា ជាមួយនឹងមនុស្សដែលគ្មានប្រវត្តិច្បាស់លាស់ គ្មានភាពស្មោះត្រង់ ជាជនបោកប្រាក់ នោះមិនខុសអីពីការយកអំបិល ទៅទម្លាក់ចូលក្នុងទឹកនោះទេ ពោលគឺវានឹងរលាយគ្មានសល់។ រកស៊ីលើអ្វីគ្មានជំនាញ ងាយនឹងដួលរលំបរាជ័យ រកស៊ីជាមួយមនុស្សមិនស្មោះត្រង់ ងាយនឹងបាត់បង់ទ្រព្យព្រោះទង្វើបោកប្រាស់។

៥. ការលែងលះប្ដីប្រពន្ធកម្សត់កម្រ

គេថាផឹកទឹកឱ្យនឹកដល់ប្រភព ជ្រកម្លប់ត្រូវនឹកដល់អ្នកដាំ ហើយការកសាងគ្រួសារមករាប់ឆ្នាំ ត្រូវចងចាំគ្រាកម្សត់កម្រជាមួយគ្នា។ ការលែងលះគ្នាជាបរាជ័យដ៏ធំក្នុងជីវិតមនុស្ស ព្រោះពេលណាទំនាក់ទំនងមួយឈានដល់ការបែកបាក់ហើយ អ្វីៗគ្រប់យ៉ាងក៏ត្រូវបែងចែកគ្នា និងខ្លះឈានទៅដល់ការរលំរលាយក៏មាន។ ផ្ទះបើពុះជាពីរក៏លែងកក់ក្ដៅ រថយន្ត បើពុះជាពីរក៏ជិះលែងបាន មុខរបរបើចែកជាពីរក៏លែងរឹងមាំ ទ្រព្យធនបើចែកជាពីរក៏អាចប្រឈមនឹងការបាត់បង់យ៉ាងឆាប់រហ័សផងដែរ។

៦. រឿងអាស្រូវបំផ្លាញកិត្តិយស

ពាក្យចចាមអារាម ឬរឿងអាស្រូវគឺពិតជាមានឥទ្ធិពលខ្លាំងណាស់ សម្រាប់បុគ្គលដែលមានយសសក្តិទ្រព្យធន មុខតំណែងតួនាទីធំដុំ។ ជាក់ស្ដែងគ្រាន់តែលេចចេញនូវព័ត៌មានមួយដែលថា មហាសេដ្ឋីចិនត្រូវរដ្ឋា.ភិបាលចិន ដាក់សម្ពាធ រហូតលោកត្រូវបាត់មុខមួយរយៈ និងក្រោយមកលេចព័ត៌មានថា បុរសម្នាក់ឈ្មោះ Ma ដែលមិនច្បាស់អត្តសញ្ញាណផង បែរជាមានអ្នកខ្លះសង្ស័យថាជាមហាសេដ្ឋីចិន លោក Jack Ma ត្រូវបានគេចាប់.ខ្លួន រហូតអង្រួនតម្លៃភាគហ៊ុនក្រុមហ៊ុន និងទ្រព្យសម្បត្តិលោកឱ្យខាតបង់រាប់សិនលានដុល្លារឯនោះ។